На крајниот источен дел од долгиот станбен комплекс, популарниот „Градски ѕид“ што го опкружува центарот на Скопје (на аголот од улиците „11-ти Октомври” и „Дама Груев“, спроти Собранието), на бетонската фасада на зградата има бронзен скулпторски релјеф посветен на жртвите на фашизмот кои загинаа за време на Втората светска војна во градот.

Бронзениот релјеф поставен во 1977 година е дело на прилепскиот скулптор Боро Митриќески, широк е околу 3,5 метри и се состои од прикази на лица и голи тела во различни искривени пози, кои со израз на мака гледаат кон набљудувачот. Сплетот од тела и лица сведочи за ужасот претрпен за време на војната, додека стилизираните окови ја делат сцената на две целини.

На ѕидот, веднаш под скулптуралниот релјеф, се наоѓал натпис со испакнати букви кој гласел: „На хероите ѕверски убиени од бугарските фашистички окупатори, на нивните синови и ќерки кои го послушаа гласот на своите предци и кои, гинејќи за татковината, ја одбранија слободата“.

Споменикот е зачуван во добра состојба и денес, и за неговото постоење не постои никаква информативна табла во близина.