И додека Италијанките нетрпеливо чекаа да се појави Тони Бандерас и да им ја облагороди саботната вечер, јас ја избрав соседната сала “Massimo” за да го конзумирам новиот “a Spike Lee joint”.

На Филмскиот фестивал во Торино има многу познати гости, а овие две имиња предизвикаа најголемо внимание кај публиката.

Вечниот фан на Њујорк Никс од првата паркет-линија беше видно расположен, и во негов стил се осврна на богатата кариера, од која посебно драг ми е првиот период од крајот на 80-те и почетокот на 90-те, кога уживавме во неговите филмови, како “Do the right thing”.

Тој раскажа за догодовштините на неговото семејство како прво афро-американско што се доселило во италијанско-американскиот Бруклин, за мајка му филмофил која го носела во кино и татко му музичар што ги направил саундтраците за неговите први филмови, за филмската школа во Њујорк во која завршил и Џармуш и во која денес предава…

…и ќе зборуваше уште многу, доколку сопругата која стоеше отстрана на излезот од киното не го опоменуваше дека треба да стигнат навреме на аеродром

Следеше проекцијата на актуелниот Спајк Ли филм “Highest 2 Lowest” со Дензел Вашингтон во главната улога, за модерен Њујорк, за музичката индустрија и надоаѓачката АИ музика без срце и душа… кој срдечно го препорачувам.