Пријатно изненадување беше прошетката низ паркот во Сарај, кој многу одамна не сум го посетил. Излетничкото место каде вообичаено не’ носеа на екскурзија во основно училиште и понатаму е вистински бисер за опуштена прошетка.
![](https://herojnaedenden.mk/wp-content/uploads/2022/04/0-1024x1024.jpg)
Иако на почетокот ве дочекува руинираниот ресторан во кој во 80-те често теравме семејни викенди, а од спротивната страна наидувате на некогашните кајак-ентузијасти кои ги користеа Треска и Вардар за рекреација на вода, ова рекреативно место со мостот е поврзано со населбата и преку него Ѓорчевци и останатите добронамерници си прават фини кружни прошетки околу среденото зеленило облагородено со сенките на старите дрвја.
![](https://herojnaedenden.mk/wp-content/uploads/2022/04/1.jpg)
![](https://herojnaedenden.mk/wp-content/uploads/2022/04/2-1024x1024.jpg)
![](https://herojnaedenden.mk/wp-content/uploads/2022/04/3-1024x1024.jpg)
Секако, убавото време беше искористено од ветераните за мал фудбал, кои влегоа во жестока препирка околу регуларноста на еден гол, пред да седнат на софра и се’ да заборават
![](https://herojnaedenden.mk/wp-content/uploads/2022/04/4-1024x1024.jpg)
![](https://herojnaedenden.mk/wp-content/uploads/2022/04/6-1024x1024.jpg)
![](https://herojnaedenden.mk/wp-content/uploads/2022/04/5-1024x1024.jpg)
Ме израдува постоењето на ниските трибини и објектот кој, иако во распаѓање, на времето беше вистинско здание во кое уживаа нисколигашите при гостувањето на фудбалски натпревар на теренот, кој исто така е добро одржуван. Околу него свој личен тренинг си одржуваше и едно момче истрчувајќи неколку кругови за краток период, во кое можеби лежи идниот Елмас. Оваа викенд-идила за момент ја нарушија само рафалите од автоматско оружје за време на свадбата во куќите недалеку оттука.
![](https://herojnaedenden.mk/wp-content/uploads/2022/04/7-1024x1024.jpg)
![](https://herojnaedenden.mk/wp-content/uploads/2022/04/8-1024x1024.jpg)
![](https://herojnaedenden.mk/wp-content/uploads/2022/04/9-1024x1024.jpg)
На крајот, по речиси четири децении, ми беше кеиф што направив слична фотографија како онаа со Стариот, овој пат јас во „неговите чевли“, седнат долу на тревникот, а подмладокот со гушка околу мојот врат.
![](https://herojnaedenden.mk/wp-content/uploads/2022/04/10-1024x767.jpg)